Før UM - 4. bolken

I stav, jenter 18/19 er det Marianne Benserud som deltar i Gneist-drakt under årets UM på Lillehammer. Stavkonkurransen går neste lørdag. I klassen er det 5 stavhopparar som er påmeldt. Paula Llano frå Laksevåg er klar favoritt, medan Marianne er rangert på 2. plass. Kaisa Bovollen Rokne (Nittedal) er bronsetipset.

På 800 meter, jenter 18/19 er det 12 deltakarar og Vilde Omholt må finna seg i å vera 12. rangert, men under løpet neste søndag må Vilde vera flink til å henga seg på gode ryggar, satsa på å betra persen på 2:25,94 og jakta på junior-NM- kravet for neste sesong, som er knapt sekundet betre enn gjeldande pers. Aurora Selstad Dybedokken (Tyrving) er favoritt, framfor Ida Elise Nymoen Eltervaag (Skjalg) og Ane Bakken Hodt (Sturla). Så er det ein spennande utfordrar-start i Vilde Svortevik (Gular).

På 200 meter, gutar 16 er det kjekt å fastslå at Emil Engeslsen Holm er i solid haustform. Hans rangering har blitt stadig sterkare siste par vekene og han er no oppe på 5. plass mellom heile 28 på startlista. Sebastian Salas Perez (Lambertseter), Abou Granli Diomandé (Orion), Damian Steinke (Molde) og Kenneth Vik Gulbrandsen (Asker) er rangert framfor Emil.

På den halve distansen, 100 meter, gutar 16, er det to fleire påmeldt - altså heile 30. Her er Emil rangert litt lengre bak, men framleis så langt oppe som nr. 10. Thomas Mardal (Sandane), Abou Granli Diomandé og Damian Steinke er medaljetipset.

Ole Martin Røssland deltar i sitt fjerde ute-UM. I dei tre første har han plukka hindermedalje av alle valørar (sølv i G15, bronse i G16 og gull i G17). Det meste er duka for medalje også i år. I skrivande stund er det berre 3 utøvarar som er godkjent på startlista. Junior-norgesmester Erik Udø Pedersen (Holum) blir klar favoritt, så får målet til Ole Martin vera å slå løpssterke Mats Bjørgum frå Strindheim i sølvkampen.

På 200 meter, jenter 15 er Renate Lie på ny medaljeutfordrar. Her er dei tre som er rangert øvst relativt sterke: Linn Oppegaard (Moss), Helene Rønningen (Tyrving) og Nathalie O. Johnsen (Sørild). Renate er rangert rett bakom der.

Så fastslår me at Amund Høie Sjursen er påmeldt 100 meter, gutar 17, at han normalt ville vore medaljekandidat i øvinga, men at start for Amund i denne øvinga framleis er tvilsam. Karsten Warholm (Dimna), Even Meinseth (Sørild) og Øystein Klareng (Orion) er medaljekandidatar elles. 25 utøvarar er påmeldt her.


Medaljetips så langt:

3 - 5 - 0