St. Hans-fest på Lillehammer (dag 3)

I skrivande stund lakkar det og lir det mot St. Hans-feiring. Det er jo ein dag som blir markert så ulikt ulike stader. På Lillehammer går det i friidrett. Her har det vore ei kjerne Gneist-utøvarar som har halde til heile stemnet og så har desse fått besøk av andre utøvarar både no til helga og på enkeltdagar. 

Også lørdagen blei det eit par strålande resultat sett med Gneist-auge:

Best av alle var ei som var på snar-visitt, Renate Lie (J14), som sprang ein svært sterk 400 meter i Jenter 15-klassen. Ja, ho vann like så godt heile konkurransen. Det gjorde ho på 60,15. Det er ei tid som både er verdt 1055 tyrvingpoeng i J14-klassen og - ikkje minst - er sletting av Nanna Gjerde sin 39 år gamle klubbrekord (!). (Den var på 60,5.)

Sondre Rinde (G14) sprang også i klassen over lørdag. Det gjorde han på 100 meter hekk - nett som han gjorde det på Nadderud. Det blei også for Sondre ein flott siger - og ei flott tid: 14,70. Dessverre var det denne gongen 2,5 i medvind. På 60 meter var Sondre langt heldigare: Her blei det først pers på 7,95 i forsøket, før han slo til med 7,89 i finalen (962 poeng). (I kule blei det 9,69 på Sondre - 726 poeng.)

Og så er Michelle Floor Heggeland (J13) også komen på plass på Lillehammer. Ho betra seg på 60 meter, til 8,54 (962 poeng), under glitrande vindforhold (+1,9), og i lengde blei det 4,57 (909 poeng).

Håvard Rinde (G11) fekk heilt optimale vindforhold i a-finalen på 60 meter: Der blei det super-pers på 9,08 (altså i +2,0), som gir 924 tyrvingpoeng (ei poengforbetring på over 100).