Før inne-UM (V)

Då er Lanzarote-gjengen komen i hus i sine respektive heimar. BFG si langdistansegruppe har hatt treningsleir der i 14 dagar, med nokre sprintinnslag, og dei er godt nøgde med opphaldet. Tre av deltakarane på treningsleiren står i sentrum for to av øvingane som blir gjennomgått her.

Først gjeld det 1500 meter, gutar 17, som går av stabelen komande fredag ettermiddag. Her stiller Anders Bjørndal, Andreas Iden og Ole Martin Røssland for Gneist. Det er 13 påmelde i øvinga og det er klar sjanse for at alle våre tre kjem på øvste halvdel av resultatlista. Ole Martin blir rangert som nr. 4, Andreas som nr. 5 (her er det hårfint, avhengig av kor langt tilbake ein går og hentar beste-resultat) og Anders som nr. 7. Både Andreas og Ole Martin har medaljesjanse, men det peikar seg i utgangspunktet ut tre andre medaljefavorittar: Vebjørn Ljones Karlsen (Skjalg), Kristian Tjørnhom (Kvinesdal) og Thor Henrik Raknerud (Askim). Men eg minnar om at Andreas tok sølv i øvinga i 2010 og Ole Martin bronse i 2011.

På 800 meter, gutar 17 er konkurransen både større og sterkare for fire Gneist-representantar. I tillegg til Anders, Andreas og Ole Martin er også Eirik H. Karstad med her. Til saman er 27 utøvarar påmeldt. Andreas er rangert som nr. 12, Ole Martin nr. 16, Eirik nr. 19 og Anders 22. Det betyr truleg at Anders er i eitt heat, Eirik og Ole Martin i eit anna og Andreas i eit tredje. Tre 1.58-løparar frå i fjor er på papiret favorittar - Thor Henrik Raknerud (Askim), Vebjørn Ljones Karlsen (Skjalg) og Simon Paul Sandbakken (Lambertseter), men her er 7-8 andre som må seiast å vera i utfordrarposisjon. Og det er naturlegvis å håpa at neste lørdags 17-årsjubilant, Andreas, kan melda seg på mellom outsiderane.

Til sist i denne gjennomgangen gjeld det 200 meter, jenter 17, der ein annan Lanzarote-farar, Marianne Benserud, er vår representant. Her stiller 16 jenter til saman og det er faktisk temmeleg tett mellom svært mange av dei. Marianne blir rangert som nr. 11, men då er ho i eit beite på 7-8 utøvarar rundt seg som er svært jamne. Anna Kvam (Kristiansand), Astrid Marie Gussiås (Molde-Olymp) og Astrid Råd Valderhaug (Tyrving) er største favorittane.