Fire utfordrarar

Terrengløpsesongen blir innleia i høljregn og liten kuling - skal me tru vermeldarane, og det plar vera nærare sanninga når meldingane er negative enn motsett - på Leirvik komande lørdag. Den blir avslutta ei veke seinare med UM/NM på Geithus i Modum, Buskerud. Dette er kortløype-meisterskapet der dei aldersbestemte spring 2 km. Gneist er representert med fire ungdommar: Stian Norheim, Aleksander Lie, Ole Martin Røssland og Jørgen Jensen Axelsen. (Det var tanken at Andreas Iden, G16, også skulle delta, men han har måtta prioritera annleis denne gongen.)

I G15 stiller me altså med to løparar, Stian Norheim og Aleksander Lie. Fjorårets to sterkaste, rekordjegarane Anders Sørensen frå Lambertseter og Edvard Kamperud Nygaard frå Ås, må vera favorittar. Bak dei er Aleksander normalt med i kampen, saman med løparar som Jonas Gjesdal, Mathias Berntzen Engevik og Markus Harbo. Eit lite hakk bak der igjen rangerer me Stian Norheim, saman med ein fin liten gjeng til. Totalt er 16 løparar påmelde i klassen. Og, som alltid i terrengløp, møter ein også langrennsløparar, ein og annan orienteringsløparar og kanskje ein syklist. I denne klassen finst i alle fall to langrennsløparar som kan blanda seg inn på øvste del av resultatlista.

I G16 er Ole Martin Røssland kandidaten frå Gneist. Her er medaljekandidatane i utgangspunktet klare i Magnus Hannevig Pettersen frå Sturla, Gustav Follerås frå Lillehammer og Jørgen Elisenberg frå Orion. Bak der er det ei sterk pulje på 4-5 løparar, der Ole Martin heilt klart er med. Han debuterte i kortløype-UM med 9. plass i Tønsberg i fjor. Det er absolutt von om betring av denne plasseringa i år. Totalt 19 er meldt på i G16.

Den kanskje sterkaste av våre fire utfordrarar er Jørgen Jensen Axelsen. Han debuterer i dobbeltklassen G18/19 neste lørdag. Det gjer han som kanskje den yngste i feltet - Jørgen fylte 17 så seint som i desember. Likevel er det liten grunn for nokon overdriven respekt frå Jørgen si side. Den største favoritten er Thomas Solberg Eide frå Haugesund, med Jørgen sin jamaldring Ferdinand Kvan Edman frå Sturla som ein annan sterk medaljekandidat, i tillegg til Sandnes sin Ahmad Muktar Adam. Bak der er Jørgen normalt med, ikkje minst i lys av sterkt testløp på Lanzarote og gode karusell-løp nyleg. Jørgen skal kjempa med heile 29 andre i G18/19.