Håp om fem igjen

Komande lørdag, 2. april, går KM i terrengløp av stabelen på Leirvik. Det første som slår ein no når påmeldingsfristen har gått ut, er ein klar nedgang i talet på deltakarar frå arrangementet på Stend for eit år sidan. Om eg ikkje har talt feil, så er det snakk om ein total nedgang på 39 deltakarar frå i fjor. Og då er eg snill sidan samanlikninga er talet på påmelde, samanlikna med dei som faktisk deltok i fjor. Eg har altså ikkje teke høgde for at det kan bli forfall mellom dei påmelde. Samtidig er det vel muleg med ein etterpåmeld eller to. Kor er til dømes kvinnheringane og etnebuen??

Så til dei som faktisk er påmelde. Gneist har deltakarar i til saman sju klassar. Dei to siste åra har det blitt fem KM-gull til Gneist og håpet er absolutt til stades om å kunna gjenta dette, sjølv om marginane skal tippa rett veg i eit par-tre klassar om så skal skje.

I tre klassar er det klare Gneist-favorittar: Casper Stenersen i G13, søster Silje Stenersen (J11) og Renate Lie (J13). Renate og Casper har kvar sine to KM-gull i terrengløp frå tidlegare og kan ta sitt tredje på rad. Silje spring 600 meter og Casper og Renate 800 meter.

I J14 er både regjerande (i J13, naturlegvis) meister Anna Serine Røssland og Ingrid Næss Johansen mellom kandidatane til gullet. Det lokale håpert er Marthe Johanne Mehus, men den på papiret tøffaste utfordraren for Gneist-jentene er Målfrid Pettersen Lunde frå Os. J14-jentene spring 800 meter. I fjor var det akkurat i lengste laget for Målfrid på Stend, men løypa på Leirvik er nok noko mindre tung og det passar Målfrid betre.

I G15 er det heile 12 deltakarar, ein av dei svært få klassane der deltakinga er betre i år enn i 2010. Her stiller to sterke Gneist-kort i Aleksander Lie og Stian Norheim. Løypa skal vera på 1000 meter. Aleksander skal i ny beintøff duell med Jonas Gjesdal frå Varegg om seieren, medan Stian er ein av mange som kjempar om plassane deretter.

G16 spring også 1000 meter. I fjor fekk me ein av mange, mange tette duellar mellom Norna-Salhus sin Jørgen Tvedt og Ole Martin Røssland. I utgangspunktet forventar me ein ny slik ein på Stord lørdag, sjølv om det er sterke folk mellom dei tre andre i feltet også.

Også i G 18/19 er det fem påmelde deltakarar. Dei skal springa 1500 meter. Fire av dei fem er treningskompisar frå BFG-miljøet, ein av dei representerer Gneist - Jørgen Jensen Axelsen. Dette blir ein svært spennande konkurranse, der Jørgen i utgangspunktet har gode sjansar. Minuset er at han har vore skadd i det siste.

Alt i alt er det teoretisk muleg med sju gull i sju klassar. Det er gode sjansar for i alle fall fire, så då bør det vera håp om... fem (igjen)?