Planen var å oppsummera Vinterkarusellen 2010-2011 i dag, men det får me legga på is. Det er på ny svikt i resultatsystemet til BFG og resultata frå gårsdagen er venta "i løpet av tirsdag". Eg var privat tidtakar i går og kunne fastslå at det vart sprunge til dels sjokkerande bra av ein del løparar. Nokre av desse kjem eg heilt sikkert tilbake til under den ordentlege oppsummeringa, men det er kjekt å kunna nemna Anders Bjørndal (G16) særskilt. Han har vore borte frå karusellen ei stund, men slo til med pers på nesten 3 minutt - ! - til 19,46. No bør neste naturlege mål vera 3000-kravet til UM (9,50), men så var det dette med motivasjonen då...
Påmeldingssystemet til KM i terrengløp har heller ikkje fungert på ein slik måte at det berre er til å lita på. For ordens skuld blei påmeldingsfristen forlenga til og med gårsdagen. No har påmeldingane auka på og deltakinga blir både god og spennande. Siste Gneist-tilskota er søskena Nora og Stian Ø. Aarvik. Nora har tre andre konkurrentar på 600 meter i J12. Her er det vanskeleg å spå, ikkje minst fordi grunnlaget for å veta kva slag jentene er i, er så tynt no i slutten av mars. Sjansane er der likevel, normalt sett. Stian skal springa 800 meter i G14. Det gjer han saman med fem andre. Favoritt i klassen ville normalt vore Øystein Ekrheim frå Etne, men han er (enno) ikkje påmeldt. Då er det kan henda duka for ein ny knall-duell mellom Stian og Stord sin eigen Lars Lunde. Eg minnar om at Stian var 1/100 framfor Lars på 1500m-statistikken i fjor, til dømes.
... Og det er ikkje sikkert me er ferdige med dette... Henrik Gravdal (G13) - ein av fleire som sprang sjokkerande godt på karusellen i går - gav i går kveld inntrykk av at han var på veg for å etterpåmelda seg til KM...
Ingen kommentarer:
Legg inn en kommentar