Før inne-UM (VI)

Då er me komne fram til nest-siste bolken i gjennomgangen av Gneist-utøvarane sine øvingar i UM i Ranheimshallenn komande helg.

Det er tilfeldig at me i dag, på kvinnedagen, ikkje har jenter å presentera, til gjengjeld har me ein 15-årsjubilant.

På 1500 meter i G15 stiller Aleksander Lie og Stian Norheim - og dei stiller sterkt. Av dei 16 deltakarane er begge to på øvste havldel av tablået. Dersom ikkje dei offisielle seedarane har misforstått burde såleis begge hamna i beste heatet av dei to heata. Aleksander er 4. rangert med 4:28,51 og Stian er rangert som nr. 8 med 4:40,31. For Aleksander gjeld det same som for 800 meter: Han er i outsiderrolle, men med klar medaljesjanse.

I kule i G15 er Magnus Leikvoll vår mann. Han støtte 4 kilos-kula 9,67 langt i fjor og har forlenga det til 9,97 inne i vinter. Det er 15 påmelde i klassen og å bryta 10 meters-grensa kan vel vera eit naturleg mål her?

Så til dei to lengste distansane for G16, der klassekameratane gjennom snart ti år, Ole Martin Røssland og Anders Bjørndal, stiller. På 800 meter er det påmeldt 22 gutar og det er sett opp fire heat. Ole Martin er rangert som nr. 14 og er med det i skjeringa mellom andre og tredje heatet. I Drammenshallen i fjor var han tett på utepersen frå året før på distansen. Fjorårets utepers var på 2:11,67. Anders har 2:24,75 frå Nadderud sist juni og om helsa blir i orden og beina vil lystra, så bør absolutt persen kunna ryka.

På 1500 meter i G16 blir det eitt tett befolka heat på 12 utøvarar. Her er Ole Martin 4. rangert med 4:26,09 frå i fjor og er i utfordrar-posisjon til medalje. Anders har ein einaste 1500-meter i bagasjen (frå Stordleikane i fjor). Då sprang han på 4:54,36. Saman med 2000-metertida blir han rangert som nr. 10 i feltet.