lørdag 19. mars 2011

Tette duellar - og vel så det

Bamseleikane sin første dag rapporterer om flotte resultat og ei rad tette duellar - og vel så det. Brørne Rinde er i stadig framgang. Lengde og - ikkje minst - 60 meter for Sondre (G13) vitnar om ein aldri så liten ketchup-effekt der borte på Stange. I forsøka var det tett, tett med heile tre utøvarar på 8,61 og ein på 8,62. I finalen kom tydelegvis vinnarviljen til Sondre sterkt fram og førte han heilt ned på 8,45 og til siger. Nest beste poengsum for Gneist-fararane stod Håvard for med 3,60 i lengde i G10, noko som gir 890 poeng. (Håvard har 3,66 og så vidt over 900 poeng frå Høiehallen i sist månad.)

Best enkeltpoengsum stod Aleksander Lie for, med 932 poeng på 600-meteren i G15, der han kom i mål til 3. plass på 1:31,10. Både UM på Ranheim og dette løpet fortel det meste om at det kjem til å bli knallharde fightar utover i utesesongen på 600, 800 og 1500 med Jonas Gjesdal frå Varegg (1:30 og 2. plass) og Mathias Berntzen Engevik frå Nittedal (med slekt på Søreide) (1:29 og 1. plass).

Aller tettast blei det likevel mellom Renate Lie og Tyrving si Mari Drabløs på 600. Sistnemnde trekte det lengste strået med 1:47,86, berre fire hundredelar framfor Renate. Siste ord er likevel ikkje sagt mellom desse to duellantane i J13, tvert om: det har berre så vidt begynt.

Ikkje fullt så tett for Ingrid Næss Johansen, som hamna på 6. plass totalt på 600 med 1:52,56. Men det var ein god fartstest som lovar godt for lengre løp enn som så for Ingrid når ein no etter kvart bevegar seg utomhus.

Bamseleikane held fram søndag med mellom anna spennande 200-meterar.

Ingen kommentarer:

Legg inn en kommentar