Ja, det har teke litt tid å fordøya all den gode friidretten, både frå Gneist-utøvarar og andre i den fine friidrettshallen på Ranheim. Søndagen bydde også på ei rad høgdepunkt. Først litt etterrakst etter lørdag, nemleg stafettane. Gutane gjorde ein heroisk innsats på 1000 meter stafett i G15/16 og tida 2:22,18 er berre tre sekund bak klubbrekorden tilbake frå år 2000. Jentene i J15/16 kan me derimot gratulera med ny klubbrekord, sidan det ikkje har vore notert rekord for dei i 1000 meter stafett tidlegare. Tida blei 2:28,10 og laget bestod av Tina Therese Jenssen, Marianne Benserud, Maren Risøen og Vilde Lund Bjørnsen.
Vilde avslutta også eiga og Gneist si totale deltaking i dette UM søndag kveld med solid siger på 200 meter i J15 på 25,81. Tida gir 1053 Tyrving-poeng og er klubbrekord. Tida er elles under alle kvalifiseringskrav - frå UM til senior-NM (noko Vilde også ordna i denne øvinga i 2010).
Marianne Benserud måtte "nøya seg" med 3. plass i stav i J16, men oppnådde sesongbeste med 3,10. Det er stadig betring av eigen klubbrekord. Marianne har med det også dette året klart alle krav til og med senior-NM (som i fjor).
Til sist til ei anna jente, som tidlegare har fått mykje ros for framgang i stav. Synne Våge Opheim gjorde det igjen fint i stav, med 4. plass og 2,60, like bak persen på 2,66. Vel så imponerande var konkurranse-debuten i tresteg. Der enda Synne på 9,75, som gav ein 9. plass, ikkje langt frå 8., som hadde gitt finaleplass i J17.
Ingen kommentarer:
Legg inn en kommentar