Før inne-UM (III)

I dag - ei veke før avreise - ser me nærmare på tre av øvingane til Jenter 16 og éi øving for Gutar 17 før inne-UM neste helg.

På 1500 meter i J16 stiller Vilde Omholt til start i sitt første innemeisterskap. Ho fekk fin erfaring på 2000 meter i fjorårssesongen og gjorde ein god figur under ute-UM i Molde i september. Vilde har derimot berre ein einaste 1500 meter å skilta med så langt, den ho sprang i steikande sunnhordlandssol på Stord i august. Då kom ho i mål på 5:33,16. Denne tida har Vilde absolutt kapasitet til å slå i Ranheimshallen. Det er åtte deltakarar til start. Dei fire alle beste i landet stiller, men bak desse er det alle sjansar.

På 60 meter i denne klassen, J16, har Gneist heile fire deltakarar mellom dei totalt 48 påmelde. Her er Marianne Benserud høgst rangert av våre, rundt 15-20. Det er vanskeleg å rangera 60 meter for desse aldersklassane, sidan det i stort monn først og fremst er ei inneøving. Marianne har 8,69 frå 2010 og 8,57 frå inne i vinter. Maren Risøen, som i fjor konkurrerte for Os, Tina Therese Jenssen og Stine Therese Hovland ser temmeleg jamne ut på papiret, eit hakk bak Marianne. Tina Therese har til dømes 8,92 frå ute i fjor, medan Stine Therese (her må ein halda tunga beint i munnen) har 8,93 inne denne vinteren.

I lengde for J16 manglar me Marianne Benserud, som var nr. 3 i landet ute i 2010. Det er påmeldt 28 deltakarar, to av dei frå Gneist. Uteresultata til desse to skulle tilseia ein spennande konkurranse, ikkje veldig langt unna finaleplass, men det eine forsøket dei to har hatt inne i vinter fortalde at dei i alle fall då (7. januar) hadde eit stykke igjen til toppformen. Legg ein likevel fjorårsresultata til grunn, så er Tina Therese Jenssen rangert som nr. 10 mellom dei påmelde med 4,84 frå i fjor og Maren Risøen som nr. 17 (4,61).

Til sist bevegar me oss over i G17, der Gneist har med Johannes Gjeraker. Johannes konkurrerer ikkje veldig mykje og bloggen har heller ikkje god kontroll over treningsgrunnlaget hans, men han gjorde ein særs god innsats under inne-UM i Drammen i fjor. Då sprang han i mål på 7,96. Det er 27 påmelde i øvinga. Dei aller beste i klassen er veldig gode, men i eit midtsjikt er det svært jamt, så får me sjå om Johannes får fart på beina denne gongen også.