Ingen aprilspøk

Det er viktig å gi BFG Fana ein (ny) sjanse no. Det ligg ein ressurs der som kan bli ganske så bra, om ting går rett herifrå. Kanskje kan ungdommen bli krye over å representera i den raude drakta også, etter kvart?

Det er vanskeleg å tena to herrar, å bygga lojalitet i to retningar. Det er vanskeleg å bygga ein "BFG-identitet" i tillegg til ein "Gneist-identitet". Det kan til og med vera uhyre vanskeleg.

Då er det viktig at det som kan gjerast, blir gjort. Her i familien har kona meldt seg til teneste for veteranane i BFG, eldstesonen har alt representert BFG her og der og om ikkje lenge følgjer eldstedottera etter, så kom ikkje her.

Men kva med BFG sjølv? Me skriv 1. april 2011. Og i 2011 bør nettsidene til ei verksemd - enten den er profesjonell eller frivillig - vera eit vitalt reiskap for å bygga byrgskap ("stolthet", på utanlandsk) og identitet. Det er på nettet "me" er, det er der me googlar oss av garde og leitar etter viktig info. Og det er når eg kjem til BFG Fana sine nettsider at eg må understreka: Dette er ingen aprilspøk.

På toppen av nyhenda i dag står det "Martine Eikemo Borge løp inn på tiden 2:10,56 under Stanford Invitational i Palo Alto sist helg." Så kan ein klikka på "Les mer". Der står... nøyaktig det same. Ingenting meir, ingenting mindre. Ingenting om kor god denne tida er, samanlikna med... osb. Og dette er heilt vanleg form for nyhendeoppdatering på desse sidene.

22. mars var det årsmøte i BFG. Det einaste som står nemnt på nettsidene er frå valet på møtet. Så vidt eg hugsar var sak om organisasjonsplan og, gjennom den, grunnlag for sportsleg satsing framover også oppe. Ikkje eitt ord på nettsidene om det.

11. mars var det årsmøte i Hordaland Friidretttskrets. Her står det pittelitt om det valet. Kvifor står det ingenting om at ein heilt sentral skikkelse i BFG gjennom mange år, Torstein Erichsen, fekk utmerkinga "Årets trenar"?

Til sist, kanskje det viktigaste: For dei som søker info om det sportslege opplegget kan ein, i prinsippet, trykka seg inn på linken "Trening". Trykker ein vidare på "Hopp", "Kast" eller "Sprint", finn ein... ingenting. Trykker ein derimot på "Distanse" finn ein følgjande kuriositet:

Sammen med IL Gular arrangerer vi et åpningsstevne på Fana stadion tirsdag 19. mai. - Hovedmålene for mange av våre utøvere vil være de nasjonale mesterskapene som går på Nadderud (UM), junior-NM i Bodø samt hovedmesterskapet som i år er på Lillehammer.

"I år" på bfgsk er 2009.