tirsdag 22. mars 2011

BFG

I kveld er det årsmøte i noko som heiter "BFG". Det er ein friidrettsklubb her i området. Så langt er det muleg å fastslå ting, men vidare er det lett muleg å bli forvirra. Ein treng ikkje å bli forvirra av at BFG på sine nettsider - under Klubbinfo og Om oss - fortel at klubben heiter "BGF Fana". Det er ein skrivefeil, sjølv om det ikkje er eit godt teikn på det som på dårleg norsk heiter "skikkelighet".

Vidare står det å lesa at BFG er frå 1987 (ein ungdom framleis) og at det er ein paraplyklubb for friidrettsgruppene i Fana IL, IL Gneist og IL Bjarg. Kva er ein paraplyklubb? Det er eit kjernespørsmål for å forstå kva BFG er for noko, naturlegvis. Friidrettsforbundet kallar denne typen klubbar for overbygningsklubb. Begge nemningane gir bod om noko vernande, noko som held oss tørre på beina.

Samtidig fortel Organisasjonsplanen for friidrettsklubben BFG Fana i punkt 1 at "...FIK BFG Fana er selveiende og frittstående med utelukkende personlige medlemmer. Klubben skal være en paraplyklubb for friidrettsgruppene i IL Bjarg, Fana IL og IL Gneist." I dette ligg eit klart paradoks - som det er muleg å leva godt med, men som det også ligg mykje potensielt trøbbel i: BFG er både frittståande, samtidig som den er nært avhengig av tre såkalla moderklubbar. Det heiter faktisk "moderklubbar" i friidrettsforbundet sin sjargong. Så her er det altså mødrene som blir verna med paraply og overbygning. No ja. (Di Derre syng i si ungdomsskildring i songen "75" at "...på kjøkkenet stod mor og holdt verden på plass...", eg trur det er langt nærare sanninga.)

Også IL Gneist er naturlegvis frittståande, med sine ulike grupper, inkludert friidrett. For å ordna forholdet mellom det frittståande BFG og det frittståande Gneist (og Fana og Bjarg) blir det inngått noko som heiter "Avtale om samarbeidende klubber". Det viktigaste punktet i avtalen reint praktisk er at "...Gutter og jenter 15-19 år fra moderklubb skal representere overbygningsklubb i konkurranser for senior og junior..." I praksis gjeld det eit par stafettar no på våren, stor-KM og junior- og senior-NM- konkurransar. I alle andre konkurransar deltar utøvarar frå Gneist i Gneist si blå drakt (BFG har raud, same som Fana IL, sikkert for å forvirra?).

Eg trur ikkje det berre er meg; eg trur det er forvirrande å forstå forholdet mellom BFG og Gneist. Eg trur det er svært mange utøvarar og foreldre som får ei slik aha-oppleving av forvirring (om det er muleg) når utøvarane nærmar seg 15 års alder. Samtidig meiner eg at ei slik forvirring er uheldig, og  at ein bør arbeida for å gjera linjene mellom desse mødrene og mødrene sine paraply-haldarar (rett og slett dårleg metaforbruk over heile linja her) klarare og meir i pakt med det som i jussen blir kalla for rettskjensla til alle engasjerte rundt friidretten i stroket rundt Fana Stadion.

1 kommentar:

  1. Nei, det er ikke bare deg; forholdet mellom BFG og de tre klubbene er forvirrende, både i teori og i praksis. Ser godt poenget med å samle resursene i Fana / Ytrebygda når det gjelder opplegget for de over 15 år, men utover det forstår jeg lite av konstruksjonen. BFG har sin helt egen agenda, og fokuserer mye på arrangementer, og bredde for de voksne, og for lite (etter min mening) på toppidrett og utviklingen av ungdommene i klassen 15- 19 år.

    SvarSlett