Hjallis

Ei slik rekordhelg som me opplever under Framolekene 2011 får ein til å minnast Hjalmar "Hjallis" Andersen sine ord då han blei spurd om verdsrekordane si utvikling på skøyter. Ein kan ikkje gå på 0 heller, sa han - med ein smule tvil i stemma. Han var rett og slett imponert over korleis rekordane berre blei flytta nedover og nedover.

Casper Stenersen (G13) tilhøyrer den gylne 98-årgangen og spring berre fortare og fortare. 4:27,35 på 1500 meter gav han 1074 poeng - klart beste løpsresultatet på gutesida i Gneist så langt denne sesongen. Det er også godt og vel fire sekund under Andreas Iden sin tre år gamle klubbrekord. Berre fenomenet Jakob Ingebrigtsen (G11) frå Sandnes IL sin 600 meter overgjekk Casper sitt løp (1:40,46 i G11 gir 1118 poeng).

Og 98-er- generasjonen held fram: Sondre Rinde hadde frå før ein solid klubbrekord på 60 meter hekk frå Haugesund med manuell tid (9,5). Lørdag flytta han også Aleksander Lie sin to år gamle rekord med elektronisk tid godt under 10-talet, til 9,79.

Både Monika Benserud og Vilde Lund Bjørnsen (J15) har sprunge raskare på 60 meter tidlegare, men det var innomhus. 8,01 på Vilde gav 1037 utepoeng og 7,93 på Monika heile 1059 poeng. 7,93 er også ny klubbrekord ute, ho har sjølv 7,87 frå innesesongen.

Ingrid Næss Johansen (J14) held fram med å forbetra sine tider, dennge gongen flytta ho 1500-metertida si ned til 5:09,59. Med det er Ingrid under junior-NM- kravet på distansen til junior-NM i Sigdal i 2012.

Til sist ein liten fin bukett: Amund Høie Sjursen (G15) er tilbake med 7,75 på 60 meter og 946 poeng, Stian Øvergaard Aarvik (G14) held fram sin fine framgang, er heilt nede på 4:33,40 på 1500 meter og oppe i 962 poeng.

Og Heine Røssland (G8/9/10/11) braut den magiske 17,00- grensa på 60 meter (16,97) - og fullførte lørdagens stemne med ein 800 meter etter at siste 1500 meter var i mål...