Hordar bankar ned dørene mine - i alle fall ein slengar på dei virtuelle epost-dørene - og undrar kor det blir av dei gamle i år? Kor blir det av veteranane? Det har vore dønn stille på banefronten sidan innesesongen. Skal me vera positive - og det skal me vel? - så samlar dei vel alle kreftene sine til Hardanger Friidrettsfestival i Strandebarm første helga i juli? Og Norna-karusellane i juli er det vel også håp for?
No ja, me kan ikkje anna enn å lova å følgja opp innsatsen til veteranane når dei måtte finna for godt å ta den - innsatsen - i bruk.
Og så, så er me naturlegvis urettvise, i vårt einsidige fokus på bane. Sommarkarusellen starta opp sist mandag med flotte løp mellom anna av Jostein Lie og Terje Norheim.
Og Hordaland Bedriftsidrettskrets sin Bedriftskarusellen er halvvegs etter Sommarløpet ved Skansemyren sist torsdag. Her har formpila til nemnde Lie peika strake vegen oppover. Han gjennomførte sitt beste løp så langt i sesongen under Sommarløpet og ligg på ein flott 4. plass halvvegs i Karusellen. Det gjer han 14 sekund framfor den yngste bedriftsutøvaren, den halvprofesjonelle snart 14-åringen Ingrid Næss Johansen (som leiar kvinneklassen) og 18 sekund framfor Lars Arve Røssland. Sistnemnde har Bloggen spesielt god kjennskap til. Formen hans har vore som ei jo-jo- ferd denne våren. Sist torsdag var han der tråden på jo-jo- en nektar å følgja med opp og ein må berre bita i det sure eplet og tvinna tråden opp med handamakt.
Også nemnde Terje Norheim sprang habilt under Sommarløpet. Terje er ikkje med i samandraget i år, men har framleis sjansen til å hausta heider for seks gjennomførte løp. Då må han gjennom fire av fem løp i den hektiske hausten.
Men, altså, her er framleis rom for framgang for dei gamle - orsak; for dei eldre - av oss!
(P.S.: Snart heimkomne Jon Iden har annonsert sesongdebut under Sommarkarusellen 20. juni.)
Ingen kommentarer:
Legg inn en kommentar