Ai, ai, ai, for ein flott kveld for friidrett! Eg tenker ikkje på Bislett Games torsdag. Vergudane har truga med å opna slusene over Bislett, så der får me nett sjå.
Eg tenker i staden på kveldens karusellstemne på Hatland, Lonevåg, Osterøy. Det var eit stemne som var nærmast uverkeleg dårleg besøkt, gitt dei glimrande forholda.
Dei to fantastiske løparane våre i 98-årgangen, Casper Stenersen og Henrik Gravdal hadde ein fantastisk duell, heilt utan at Casper var til stades. Henrik sprang eit sterkt åleine-løp på 600 meter. I mål kom han på ny pers og ny klubbrekord: 1:35,75. Det er smått utrulege eitt hundredel framfor tida Casper oppnådde under Hovdingleikane for ein månad sidan. No gler me oss til Tyrving!
Ole Martin Røssland (G16) følgde opp sin fine 2000 meter frå Framo søndag då han flytta persen på 1500 meter ned med nye fem sekund, til 4:18,24.
I same heatet kjempa Jørgen Jensen Axelsen (G18) seg inn til 4:12,55, eitt tidel under årsbeste og to og eit halvt sekund bak persen frå 2010.
Det var også fine 1500 meter-løp av Anna Serine Røssland (J14), eitt sekund bak den nybakte persen frå Framo (5:14), av Stian Norheim (G15), som var eit par tidel bak persen frå i fjor (4:40) og av Stian Ø. Aarvik (G14), som hamna i "feil" heat og sprang solo-løp til 4:38.
Alt i alt ein flott kveld for friidrett. Eg kan visa vegen til Lonevåg neste gong...
Ingen kommentarer:
Legg inn en kommentar