1977

I 1977 var eg ti år gammal og ein særs ivrig lesar av Donald-bladet. Skal eg vera snill og grei, så harmonerer det ganske godt med essensen i Donald Duck at resultatlistene frå Donald Duck Games på Bislett i starten av helga berre slik haltande finst enno. Resultata frå fredag 10. juni er lagt ut under linken "Se resultatlistene fra lørdag her!" Medan resultata frå lørdag 11. juni ikkje finst nokon stad. Enno. Men dei kjem nok.

14. september 1977 sprang ei 14 år gammal Gneist-jente, Ingrid Sandvoll, lengre enn kva som var lovleg då og kva som er lovleg no, 3000 meter. Og ho gjorde det særs godt: 10:54,1 er framleis klubbrekord på denne ulovlege distansen. 2. pinsedag gjorde Ingrid Næss Johansen (J14) sitt første angrep på Ingrid Sandvoll sin 34 år gamle rekord. På sitt første baneløp på distansen kom Ingrid i mål på 11:19,98, inne i pinsesola i Ulvik. Neste 3000 meter for Ingrid er planlagt i Strandebarm første søndagen i juli.

I 1977 debuterte eg som organisert idrettsutøvar, rettnok i fotball. Mandag debuterte Kristian Schjønningsen (G12) i Gneist-drakt under Ulvikaleikane. Den tidlegare representanten for friidrettslaget Frisk i Fyllingsdalen sprang på fine 1:46,88 på 600 meter og støtte kula 8,16. Det siste er det sjuande beste kastet for gutar i Gneist-drakt i 2011.