Tirsdag var det karusell på Osterøy, onsdags kveld var det dei gjenoppståtte Askøylekene ute på Ravnanger. Som del av ein BFG-gjeng var Jørgen Jensen Axelsen (G18) einaste Gneist-svale på banen ved Lonevåg (på Hatland, meir presist) tirsdags kveld. Han konsentrerte seg om 800 meter og flytta persen ned på 2:05,78. Målet er vel 2:03 og UM-kravet, vil eg tru.
Det var ei meir rikhaldig gruppe som tok turen til Askøylekene. Totalt sett var det faktisk overraskande mange deltakarar på Ravnanger, men forventninga var på den andre sida låg - både til talet på deltakarar og til veret. Så, når sant skal seiast, det var rett og slett eit lite stemne. På den andre sida var veret det beste eg kan hugsa frå desse leikane: opphald, inntil to sekundmeter med vind og rundt 10 grader. Fantastisk!
Resultatlistene kjem nok ikkje på ei stund frå Askøy, men Espen Bjørndal (G11) er i gang med utesesongen på ordentleg og sprang ein fin 60 meter og landa på 3,93 i lengde. Maria Tyssebotn Berg (J13) flytta også persen nærare 2,00 på 600 meter då ho vann klassen sin. Høgdepunktet var det rivande oppgjeret på 800 meter - Stian vs. Stian - der yngstemann Aarvik drog det lengste strået med strålande 2:16, sekundet framfor Norheim.
Og arrangementet? Det halta svært på Ravnanger og det er ei gåte at dette er vår fremste storstemne-arrangør for tida - med junior-NM i fjor, UM neste år og ambisjon om senior-NM ganske snart. Det var, som nemnt, eit lite stemne og det tok frykteleg lang tid å avvikla.
Neste gong hoppar me nok tilbake til Osterøyne, når me har valet.
Ingen kommentarer:
Legg inn en kommentar