Hovding.NETT

Nedteljinga held fram. Det er altså to dagar igjen til Hovdingleikane. Det er også på tide å jakta på informasjon om stemnet. Kor er det me jaktar på informasjon om stemne i våre dagar, i 2011? Jo, på nettet, naturlegvis. (I parentes: Det er no åtte dagar igjen til Mailekene sin påmeldingsfrist og det er framleis berre muleg å melda seg på 60 meter. For 11-åringar. Men heldigvis gjeld det både gutar og jenter på 11 år.)

På invitasjonen på terminlista på friidrett.no finst det ei nettadresse til Hovding. Det var jo ein naturleg stad å starta.

Kva finn me der? Jo, ei framside som er prega av fotball. Det er så, det er no vanleg og det får me leva med. I menyen til høgre er det muleg å bla seg fram til friidrettssidene.

Storarta... For kva er det som står her? Jo, dette:

Friidretten viser nye sider

Hovding har gått over til nye nettsider og friidrettsgruppa er med på lasset. Synest du det er tungvint å finne dei nye sidene våre?
Her er ei lenke direkte til friidrettsgruppa sine sider: http://bit.ly/hovding.

Så prøver me denne nye fine linken og tenker endeleg!
Og... kva er det som står her? Jo, dette:

Friidretten viser nye sider

Hovding har gått over til nye nettsider og friidrettsgruppa er med på lasset. Synest du det er tungvint å finne dei nye sidene våre?
Her er ei lenke direkte til friidrettsgruppa sine sider: http://bit.ly/hovding.

Runddansen er komplett.

Googlar me Hovding finn me eit par retteleg gamle sider her.

Men heldigvis finst det også ein blogg, etter same malen som denne. Denne blei "lagt ned" i desember i fjor, fordi det skulle koma så framifrå nye nettsider (sjå over), men har heldigvis gjenoppstått, så her finst endeleg all viktig info framfor Hovdingleikane 2011...!