Eg må vedgå det, det var i skuggen av Mailekene at det pågjekk KM i magekamp i den framleis nye idrettsparken i Arna denne helga. Det var til og med eit ope KM, med flinke folk både frå andre stader på Vestlandet og frå aust.
Gneist har gjort det bra i fleire år i dette kretsmesterskapet, ikkje minst på jentesida. Søstrene Benserud og 98-gjengen, med Renate Lie i spissen, har vore vanlege deltakarar og flittige premievinnarar. I år var det ingen Gneist-jenter med, fleire av dei aktuelle var nettopp i Haugesund. Brørne Leikvoll og brørne Blücher var i staden verdige representantar, med KM-gull til Kristoffer Blücher i G12 og til Eirik Leikvoll i G13. Kristoffer sin poengsum er tett bak Henrik Gravdal sin klubbrekord i 4-kamp, sett i fjor.
Eit hav av rekruttar boltra seg på Fana Stadion fredagskvelden. (Underteikna sine rekruttar var då, som kjent, på veg til vene og vindfulle Sunnhordland.) I tillegg sprang to ungdommar 80 meter hekk, mellom dei Monika Benserud (J15), som fekk notert seg 12,49, som gir 1001 Tyrving-poeng. Av gammal vane sjekkar eg alltid klubbrekordane når Monika er på farten. Denne gongen fekk eg tryggleik for at dei yngste ungdommane er i gode hender: Klubbrekorden på distansen tilhøyrer 10-12- trenaren Kjersti Ristesund Bjørndal, på sterke 11,66 frå det (eg veit eg har nemnt det før) segnomsuste året, 1985.
Ingen kommentarer:
Legg inn en kommentar