Farvel til Fana

Okei, så var det gjort. Så enkelt. Så komplisert.

Onsdag kveld bestemte eit fleirtal på det ekstraordinære årsmøtet i Fana IL Friidrett å seia opp samarbeidsavtalen med Friidrettsklubben BFG Fana.

Det var ei noko spesiell jubileumsgåve frå ein av moderklubbane, 25 år etter at Bjarg, Fana og Gneist var med på å stifta friidrettsklubben.

Kva betyr dette?

Det vil vera feilaktig å påstå at det ikkje betyr noko. Men det vil vera like gale å hevda at avgjerda rokkar ved den kursen som BFG er på: Friidrettsklubben BFG har svært mykje positivt på gang og Fana sin avgang hindrar ikkje noko som helst av dette.

Det er all grunn til å imøtesjå 2013-sesongen med forventningar. Det er forventningar knytt til sportslege resultat, men det er også forventningar knytt til klubb- og miljøbygging.

Friidrettsklubben BFG tar mål av seg å bli den krafta i det lokale og nasjonale friidrettsmiljøet som klubben alltid har hatt potensial til å bli.

Fana har teke sitt val. Om farvelet blir førebels eller varig, det gjenstår å sjå. Det som no er «naboklubben», meir enn «samarbeidsklubben», er uansett velkommen tilbake.