Dobbel medaljefangst

Vikersund/Prestfoss/Heima: Då er årets junior-NM over i fagre Prestfoss, Sigdal. Dette blei eit godt meisterskap. Det var godt å vera til stades på den intime arenaen. Og det er nesten alltid slik at ei lita bygd med stor dugnadsånd skaper dei beste arrangementa. Dei har noko å leva opp til no, der ute på Askøy til UM i august/september.

Søndag sikra Martine Eikemo Borge dobbel individuell siger i år som i fjor i U23, då ho vann 800-meteren på 2:11,09. Det var BFG sin tredje gullmedalje.

I fjor blei det trippel på Martine, då ho også var på vinnarlaget på 1000 meter stafett. I år blei det sølv i staden, knepent bak Vidar frå Oslo. På laget sprang Monika Benserud, Christine Bjelland Jensen, Vilde Lund Bjørnsen og Martine Eikemo Borge. (Tid: 2:14,41).

Eit sølv til blei det avslutningsdagen: Anna Serine Røssland debuterte på 2000 meter hinder i sjølvaste junior-NM og gjorde det til 2. plass på 7:49,35. Anna Serine var for to år sidan første jente på 13 år i Hordaland som sprang 1500 meter hinder. Søndag blei ho første jente i Hordaland på 15 år som gjennomførte ein 2000 meter hinder. Tida er dermed også den første kretsaldersrekorden på distansen i J15 (og klubbrekord i Gneist...).

Den tredje og siste medaljen avslutningsdagen stod Marianne Benserud for, med sine 3,10 i stav.

For å komplettera: Jørgen Jensen Axelsen sprang i mål på 6:26,41 på sin 2000 meter hinder, noko som gav 5. plass.

Totalt gir dette BFG Fana 8 medaljar i årets junior-NM: 3 GULL, 2 SØLV og 3 BRONSE. I 2011 blei det 3 gull og 1 sølv. Sjølv om talet på gullmedaljar var det same i år som i fjor, så er altså den totale medaljefangsten dobla - frå fire til åtte.

Og prognosen er god for ytterlegare auke i Overhalla i Nord-Trøndelag i august 2013...