Karusellen for gamle travarar (*)

Fem gongar, slik om lag anna kvar torsdag, i vår og fem gongar, slik om lag kvar torsdag, i haust går Bedriftskarusellen sine løp av stabelen. Det er tøffe saker. Dei fleste av oss er slike som her levd ei stund, trent ein del, men ikkje for mykje heller. Frå gong til gong møter me på representantar for dei meir profesjonelle løparane, som har noko å fara med på eit høgare nivå også. Men travarane, som går igjen frå løp til løp, me er stort sett slike som har trava lenge - i lengste laget - men som ikkje nødvendigvis hugsar kor gamle me er blitt. Eg meiner; sjølv trudde eg at eg var 17 då eg langa ut i dei tøffe motene frå start i gårsdagens løp, så blei eg brått nesten tre tiår eldre ein liten kilometer seinare. No ja.

For 14 dagar sidan starta det med terrengløp på Storetveit-markene, i går kveld var turen komen til løypa på Hordvikneset. Å dra te' Salhus, det er ei tøff løype. Det var ei mager trøyst at den var tøffare i fjor. då var grasbakkane der ute gjennomblaute, i går var dei berre tøffe. Løypa var 3km. Minst.

Så til det sportslege: Fotnoten i tittelen gjeld unntaket. Den desidert yngste travaren er 13 1/2 år gamle Ingrid Næss Johansen, som vann "kvinneklassen" suverent i går og som leiar for - la oss no seia det - jentene, også det suverent.

Mellom mennene finn me underteikna, LA, på 6. plass og Jostein Lie på 7. plass i samandraget. I gårsdagens løp kom Gneist sine representantar som perler på ei snor: Jostein med 13:29, LA med 13:31 og Ingrid med 13:32. (No er det rettnok berre Ingrid som representerer Gneist i karusellen, Jostein spring for Statoil og underteikna for Universitetet sitt bedriftsidrettslag, det velrennomerte UBIL.)

Neste høve er den kortaste runden i Hordnesskogen, den på om lag 4,2km, den 12. mai. Me må berre bli kvitt stølheten først.

Kondis sin reportasje frå løpet på Hordvikneset