2012

Då eg gjekk i ungdomsskulen fekk me ein gong ein ny gymnastikklærar. Han hadde gått på Sjøkrigsskulen og me fekk av den grunn ein veldig respekt for han, slik i starten. Men så viste det seg etter kvart at han var ein vanleg, men likandes, kar, som kunne sine saker heilt ok.

I går blei Sjøkrigsskulestafetten gjenoppliva ute i Gravdal. Ifølgje rapportane derifrå er dette ein vanleg, men likandes stafett som er heilt ok. Den er nok på kartet igjen også i 2012.

Det var tanken at eg skulle få sjå gjenopplivinga på nært hald, men i staden låg eg med dårleg helse og tenkte at formen ikkje kom til å vera på plass igjen før... i 2012.

Og no ligg den høgst preliminære - som på norsk betyr høgst førebelse - terminlista for 2012 føre. Mykje er usikkert i den, men me noterer eit par-tre interessante ting:

- Inne-UM i Sandnes er sett opp helga 9. - 11. mars. UM i mars har ikkje vore vanleg (i alle fall ikkje dei siste åra) før årets mars-utgåve i Trondheim.
- 14.-15. april går så kort-UM/NM i terrengløp i Strandebarm.
- For oss som har konfirmantar i 2012 noterer me oss Holmenkollstafetten 12. mai
- Førebels er junior-NM i Sigdal sett opp i juli månad, 27. - 29. juli. Så får i så fall også juniorane friare høve til å sjå på OL frå London frå 3. august...
-  Og UM på Askøy er sett opp 31. august - 2. september.

Så får me satsa på at helsa kjem i vater igjen og me på ny kan konsentrera oss om 2011.