Sommartid

God sommar! Sommartida er innført, både på klokka og i veret. Aller mest sommarleg var det lørdag, då KM i terrengløp blei arrangert på Stend.

Ingvild Myking vann jenter 15-klassen som ho ville. Det var Ingvild sitt andre KM-gull i terrengløp.

Renate Lie tok sitt sjette strakte KM-gull i terreng då ho vann J16-klassen, men denne gongen var det nett så vidt. Linn Seliussen kom sterkt på slutten og var rett bak Renate i mål. Hedda Grønhaug (Bjarg) tok bronsen.

I J17 var det Anna Serine Røssland som blei den lokale medaljevinnaren, då ho tok bronsen, bak Ingrid Folvik (Bergen Turn) og Christina Hopland (Varegg).

Vegard Albrigtsen overbeviste då han tok sitt første KM-gull og vann G16-klassen.

I gutar 18/19 blei det tredje KM-gullet i terreng til Jørgen Tvedt frå Norna-Salhus - det første vann han på Stend som 15-åring. Sølvet i klassen gjekk til Andreas Iden, som blir endå sterkare når det blir baneløp.

I fjor blei det sølv i 18/19, bak nemnde Jørgen Tvedt, for Erlend Gjerdevik Sørtveit, men denne gongen gjekk han til topps i U23-klassen, med eit godt løp over 3 km.

I tillegg blei det også KM-gull på Petter Rasmussen i 40-44- klassen.