Før KM i terrengløp

Aaah, for ein vår...! Markene på Stend/Stavollen er rett som det er skrekkeleg blaute. Denne gongen er dei det ikkje. Eg ser framleis for meg at det kan bli svært mykje tyngre forhold - i tillegg til lengre løyper - når me kjem til NM i terrengløp på same markene 11. oktober. Men til KM komande lørdag blir det tørre bakkar og tosfira tal grader!

Gneist er arrangøren ved dette høvet (og BFG Bergen til hausten).

Det er berre 15 år og eldre det blir arrangert KM for denne helga, medan Frisk i Fyllingsdalen tar seg av dei yngre første helga i mai.

Her er BFG-klubbane sine deltakarar:

Jenter 15
Her er det 3 påmelde utøvarar - medalje til alle... - og Ingvild Myking (Bjarg) er storfavoritt til KM-gullet.

Gutar 15
Her debuterer Jan Jakobsen (Bjarg) i denne typen løp. Det blir spennande å sjå korleis treningsivrige Jan får det til i desse løypene. Han har fire andre i startfeltet i klassen.

Jenter 16
Her stiller det 4 jenter - 3 av dei frå IL Gneist. Sidan det "berre" er 1000 meter i terrenget, så får Renate Lie vera favoritt til å ta sitt sjette strake KM-gull i terrengløp, men Linn Seliussen vil truleg ikkje vera langt unna. Og så blir det kamp om 3. plassen mellom Maria Josefine Berg og Bjarg-jenta Hedda Grønhaug.

Gutar 16
5 deltakarar er påmeldt i denne klassen. Orienteringsløparen Markus Kjærner-Semb frå Varegg er favoritt, men ein Vegard Albrigtsen i stadig framgang bør vera kandidat til plassen bak der, truleg i hardast konkurranse med Magnus Heggøy (Ask).

Jenter 17
Heile sju sterke 1997-jenter finst på startstreken i denne klassen. Varegg har favoritten i klassen i Christina Ellefsen Hopland - nyleg kjent frå tosiders-oppslag i BA. Også løpsferske Ingrid Halvorsen Folvik (Bergen Turn) og ei røys med Gneist-jenter er med i medaljekampen: Eline Myking, Ingrid Næss Johansen, Anna Serine Røssland, Thyra Hevrøy og Elina Drivenes.

Gutar 18/19
Lørdagens største felt finst i denne klassen: Her finst 10 namn på startlista. Dersom eg er småfeig og tippar kven som er i topp 6, så finst alle tre Gneist-utøvarane der, i tillegg då til 3 andre: Jonas Gjesdal (Varegg) er knepen favoritt, medan både Jørgen Tvedt (Norna-Salhus) og Tom Skjæråsen (Norna-Salhus) blir å rekna med, i tillegg til Andreas Iden, Ole Martin Røssland og Stian Norheim.

U23 - menn
Her er det 3 frå kretsen på lista, i tillegg til at Dag Einar Bøtun frå Stavanger Friidrettsklubb (Spirit) også finst her. Det er gode grunnar til å tru at dette blir eit jamt felt, der vår mann, Erlend Gjerdevik Sørtveit, bør ha sjanse til å hevda seg, saman med Espen Joensen (Fri) og Morten Aadland Fossmark (Varegg).

Menn senior
Dette er eit 8 mann sterkt felt - og då meiner eg sterkt. Her er utøvarar som også kjem til å prega NM-konkurransen på Stord om ei god veke. Det skal springast 3000 meter, noko som gjer konkurransen endå meir open. Marius Vedvik (Gular) har vist kanonform i vinter, medan den ferske Varegg-løparen Halfdan-Emil Færø, Jonas Lurås Hammer (Gular) og Erik Hovlandsdal (Norna-Salhus) også vil vera med og prega dette. BFG-representanten er Espen Roll Karlsen. Espen er ein av fleire BFG-påmelde som har slite med skade i det siste, så her er det håpet at Espen startar og er i gang igjen.

**

Så er Petter Rasmussen og Egil Johan Hessen påmelde i sine respektive veteranklassar. Begge skal - dersom det ikkje kjem eit renn med etterpå-påmeldingar i finaveret - vera sikra medalje: Petter har éin konkurrent, Egil to ved påmeldingsfristens utløp.