Før inne-UM (III)

Så blir det tid til ein liten førehandsporsjon før inne-UM også i dag, sjølv om det er mandag aldri så mykje.

Aller først i dag til Henrik Almenningen sine øvingar i G17:

* På 200 meter har Henrik vore i veldig framgang i vinter. Her er det 34 utøvarar i klassen og Henrik blir rangert like over midten - som nr. 16. Abou Granli Diomandé (Orion), Sebastian Gullien Perez (Lambertseter) og Markus Einan (Ullensaker/Kisa) er mellom dei ypperste favorittane.

* 60 meter har endå fleire på startlista, heile 47. Også her har Henrik hatt god framgang denne vinteren og også her er han om lag midt i laget i førehandsrangering - som nr. 24. I tillegg til dei nemnde favorittane frå 200 meter, så må me her ta med den lokalt forankra Christoffer Sandven (AKS-77) som ein utfordrar.

* I lengde gjorde Henrik det strålande i dei to ungdomsmeisterskapa i 2013. Innomhus i Steinkjer blei det sølv. Då var det temmeleg overraskande, i alle fall på underteikna. Men dette året må Henrik finna seg i å vera medaljekandidat alt på førehand. Størst favoritt er hopp-esset i klassen, Erik Lund frå Brandbu. Bak der er Odin Hallquist (Koll) rangert, medan Henrik og Kristoffer Perry Aas (Sturla) er temmeleg likt på papiret.

* I tresteg er Henrik utfordrar til medalje, mellom dei 8 på startlista. Igjen er Erik Lund favoritt, medan Ulrik Sæther Langvik (Fredrikstad) og Markus Nikolai Berner (Tyrving) er solide kandidatar til medalje dei og - men Henrik har absolutt sjansen til to hopp-medaljar.

Så til ein bunke med startar i 18/19-klassen. Først til 1500 meter, der Andreas Iden og Ole Martin Røssland er påmeldt til innesesongens første start. Heile 24 utøvarar er påmeldt. Ingen av dei store under 4 blank-kanonene er med, så her er sjansar for mange. På førehand plasserer me Ole Martin som 12 og Andreas som 13. Abduljaleel Hir (Selsbakk), Jørgen Elisenberg (Orion), Kristian Tjørnhom (Kristiansand LK), Mathias Berntzen Engevik (Tjalve) og Sigurd Blom Breivik (Ullensaker/Kisa) er nokre mulege medaljekandidatar.

Amund Høie Sjursen er nyleg fylt 18 år, men det hindrar han ikkje i å vera mellom favorittane i fleire øvingar i 18/19-klassen. På 60 meter er han rangert like bakom favoritten Jonas Halonen (Tyrving), saman med Karsten Warholm (Dimna). Heile 54 utøvarar er påmeldt den kortaste øvinga.

I lengde er Amund favoritt, med sitt 7,36-hopp frå Pingvinlekene som utgangspunkt. Her er det 14 med, og normalt er det ein tett duell mellom Amund og Karsten Warholm om sigeren.

Til sist; høgde, der Amund blei UM-vinnar i G17 ute i haust, og der han stadig hoppar høgare. Her er Warholm favoritt, tett følgt av Martin Fagelund (Sturla), med Amund som 3. rangert på førehand (1,96 som pers frå innesesongen). Magnus Leikvoll er også påmeldt i høgde og med 1,80 frå innesesongen og 1,83 ute i fjor, så er Magnus om lag midt på lista mi, som nr. 7 av dei 12.