Kastdugnad

Gneist er ingen kasteklubb. Det er ingen påstand det er muleg å diskutera - akkurat no. For dei av oss (ja da, eg veit me er ikkje mange) som er opptekne av lagserien, så er det slik at med berre nokre få habile kast til i klubben, så ville plasseringa som kretsens beste vera sikra både for gutar og jenter.

Gneist er ingen kasteklubb, men med det første eigne kaststemnet torsdagskvelden, så er det kanskje etablert ein liten tradisjon som i alle fall kan hjelpa til med ein kastdugnad inn mot lagserien - slik at  kan ha håp om å ha nok resultat i kast til alle våre lag.

Slengball
Her kom nokre av kveldens aller beste resultat, målt etter tyrvingtabellen. Pål Haugen Lillefosse (G10) fekk opp 18 meter jamt (892 poeng). Charlotte Harris (J11) nytta høvet til å etablera ny klubbrekord med 13,44. Ny klubbrekord blei det også på Gjert Høie Sjursen (G11), som med 28,18 sletta Øyvind Liland sin 40 år gamle rekord (!) på 21,66. Kastet til Gjert gir også flotte 972 tyrvingpoeng.

Diskos
Her noterer me oss følgjande teljande resultat til serien:
- Pål Haugen Lillefosse (G10): 15,43 (781 poeng)
- Sindre Kampen Nesheim (G10): 11,11 (565 poeng)
- Magnus Leikvoll (G15): 33,27 (368 poeng)
- Charlotte Harris (J11): 11,17 (266 poeng)
- Eirik Leikvoll (G13): 20,56 (228 poeng)
- Amund Høie Sjursen (G15): 30,08 (209 poeng)

Kule
I kule fekk me fire nye eller forbetra resultat:
- Sindre Kampen Nesheim (G10): 5,49 (740 poeng)
- Magnus Leikvoll (G15): 10,84 (648 poeng)
- Maria Josefine Tyssebotn Berg (J13): 5,83 (490 poeng)
- Eirik Leikvoll (G13): 7,13 (397 poeng)

Spyd
I spyd fekk me også ein ny klubbrekord, då Amund Høie Sjursen betra Aleksander Lie sin ferske rekord i G15 med det nyaste 0,6-spydet (vel me å tru; resultatlista seier at gutane kasta med kilo-spyd...) til 31,11 (372 poeng). Elles:
- Pål Haugen Lillefosse (G10): 14,75 (690 poeng)
- Sindre Kampen Nesheim (G10): 8,88 (455 poeng)
- Magnus Leikvoll (G15): 28,88 (283 poeng)
- Stian Ø. Aarvik (G14): 22,80 (256 poeng)
- Eirik Leikvoll (G13): 17,82 (92 poeng)