Bergen - oppsummert

Då går det definitivt mot slutten av årets banesesong. Haustens største stemne, Bergenslekene, gjekk av stabelen på Fana Stadion denne helga. Komande helg er det fri for dei fleste, før Fanalekene avsluttar helgestemna. I tillegg kjem det tre onsdagar med tilbod - først to Norna-karusellar og til slutt Gneist sitt løpsstemne.

Mykje gjævt blei oppnådd denne helga. Her kjem eit forsøk på oppsummering av noko av det gjævaste:

Kristoffer Blücher (G12) sette sin fjerde sprint-klubbrekord i årsklassen då han sprang inn på 8,39 på 60 meter lørdag. Det gir 1002 poeng i tillegg! Så tar me med at Kristoffer var fattige 2/100 unna Amund Sjursen sin klubbrekord på 80 meter søndag (11,28 mot 11,26). Det er den Kristoffer manglar for å vera fulldekka med rekordar frå og med 60 meter til og med 300 meter. Det er vel ein sjanse til på løpsstemnet?

Kristian Schjønningsen (G12) fekk vel sin aller første klubbrekord, etter overgangen frå Frisk, då han kasta diskosen til 22,73. Sondre Rinde hadde den gamle rekorden frå i fjor, på 21,22. Kristian persa også i lengde, til 4,66 (940 poeng).


Pål Haugen Lillefosse (G10) sprang 60 meter på 9,37 (954 poeng) og 80 meter på 12,59 (903 poeng).

Espen Bjørndal (G11) markerer seg stadig meir. I lengde fekk han denne gongen pers med 4,21 (932 poeng), medan han oppnådde 11,05 på 60 meter hekk (her er det Stian Norheim som har klubbrekorden på 10,80).

Aleksander Lie (G15) sprang ein habil 200 meter hekk, på 29,29 (946 tyrvingpoeng).

Jørgen Jensen Axelsen (G18) viser fin form framfor helgas UM/NM i terrengløp. Lørdag persa han solid på 800 meter, til 2:03,27 (860 poeng). Søndag betra han pers/klubbrekord (i både Gneist og i BFG) på 2000 meter, til 5:48,91 (964 tyrvingpoeng).


Eirik Henriksen Karstad (G16) sprang endeleg ein UM-relevant distanse, då han persa til 2:09,41 på 800 meter. Her bør G17-kravet på 2:05,00 vera eit naturleg mål gjennom treningsvinteren! Formidabel framgang på stadig fleire distansar registrerer me også på Anders Bjørndal (G16). Over 5,5 sekunds betring på 800 meter blei det denne gongen, til 2:14,05.

Det er også verdt å nemna at Herman Hovland (G12) betra spyd-persen sin, til 28,16 (758 poeng). Det er trass alt langt mellom kast-prestasjonane i Gneist.

Renate Lie (J13) sprang ein formidabel 800 meter lørdag - i J15- klassen. Ho persa solid til 2:25,59 - og tok 2. plass mellom 15-åringane. Klubbrekorden er her likevel på sterke 2:22,1 frå 1979 (Beate Sejrup).


Anna Evensen (J11) persa på 60 meter, til 9,25 (892 tyrvingpoeng).

Nora Ø. Aarvik (J12) pynta på 600 meter-persen sin, til 1:51,06.

Anna Serine Røssland (J14) betra si 800 meter-tid til 2:31,70. Med det kvalifiserte ho seg også for distansen under UM på Askøy neste haust, og kan no i praksis velja mellom 1500 meter hinder, 2000 og 800.