Nokon visare enn meg må ein dag forklara meg skilnaden mellom ein region og ein krets. Ja, normalt meiner eg at eg veit det (og kanskje også at eg er nokolunde vis), men i tilfellet "Regionsmesterskapet for Hordaland" melder eg pass. Kretsane føl stort sett fylkesgrensene. I geografien elles vil ein "region" vera ei samling av fleire fylke, ein region kan også vera eit mindre område. Men så vidt eg har forstått er her "regionen" og "kretsen" det same?...
Vel, vel, første delen av dette Regionsmesterskapet blei i alle fall avslutta søndag. Det var dei eldste gruppene som gjorde seg heilt ferdige borte i Høiehallen. Monika Benserud (J15) gjer det framleis skarpt i hekkeløp, med 9,12 på "gamlehekken", 60 meter (76,2). Når me kjem utomhus, så er det 80 meter som gjeld (men der har Monika alt samla seg erfaring frå fjoråret). Søster Marianne (J16) vann høgde på 1,50 (etter omhopp, like så godt). 1,50 er 2 centimeter over UM-kravet. Amund Høie Sjursen (G15) var for så vidt fem centimeter bak UM-kravet i lengde, då han prestert 5,40, men han var jo godt over dette med 5,85 ein haustdag på Osterøy i fjor.
No er det mange av oss som ser fram til innomhusmesterskapet i 2012 (enten om det er region- eller krets-), ute på Leikvang med løp som er lengre enn 60 meter også! Symbolsk for lengten etter det litt lengre får Ingrid Næss Johansen (J14) vera: Ho sprang 800 meter i Stangehallen søndag, der ho kom i mål på 2:44,04. Vel er det eit stykke å køyra til Leikvang, men noko nærmare enn Stangehallen er det i alle fall! Me gler oss.
Ingen kommentarer:
Legg inn en kommentar