Årets mest framgangsrike 2011

Hallo, året er knapt tre dagar gammalt, så det er ein smule tidleg å kåra "Årets mest framgangsrike 2011", men:

Tittelen "Årets mest framgangsrike" blei teken i bruk til markeringane under grautfesten i desember i fjor. Vilde Omholt og Stian Norheim blei dei to første som blei tildelt denne heideren.

Det er viktig å trekka fram dei som kjem bakifrå, som drahjelp i prosessen fram til at dei også er mellom rekordsetjarane og medlemmene i 1000 poengsklubben - og slike ting.

I løpet av 2011 vil denne bloggen med jamne mellomrom kasta eit sideblikk til kven som har markert seg med framgang frå året før. Slik sett kan desse oversiktene heilt uformelt sjåast på som ein "Dei nominerte er..." fram til styret tar endeleg og høgtidleg avgjerd på sitt møte i november månad.

Innesesongen dominerer dei neste par månadene, forståeleg nok (snøen ute legg seg fint oppå all isen, går snart over til regn som igjen skal bli avløyst av meir sludd/snø/regn etc.). Og i gang skikkeleg er me komande helg, med stemne i Høiehallen fredag og hopp-KM i Laksevåghallen lørdag.

Så langt i innesesongen er det først og fremst stavframgangen til Synne Våge Opheim som peikar seg ut. Den åleine må sjåast på som ein solid søknad om plass mellom "Dei nominerte".

So er me i gang.