God romjul

For tredje året - av tre mulege - blei det skipa til romjulsstemne i Leikvanghallen før helga. Spesielt på sprint blei det prestert særs godt.

Monika Benserud sprang 60-meteren på 7,80. Det er ny innepers (og for så vidt godt under utepersen også). Den gamle blei sett alt under inne-NM i Ranheimhallen i februar 2011 (7,87). Monika sette også ny bestenotering i BFG på den ukurante distansen 150 meter, der ho sprang på 18,61. (Maren Haugen Lillefosse hadde den gamle bestenoteringa, på 20,44, frå fjorårssesongen.)

Elise Una Mikkelsen sprang 8,39 på 60 meter.

Renate Lie innesesong-debuterte med 26,91 på 200 meter.

Eline Myking fekk solide 2:23,91 på 800 meter - like bak utepersen på distansen.

Amund Høie Sjursen sette ny 60 meter-pers på 7,13. Den gamle var frå inne-UM i Steinkjer i mars.

Aller første løpa i BFG-alder blei det på Kristoffer Blücher. Han sprang sin 60 meter på 7,57. Det er tre hundredelar under innepersen frå Pingvinlekene sist februar. På 200 meter blei det 24,29 på Kristoffer - her er det to hundredelar betring av innepersen (frå Stange i februar).

Magnus Leikvoll sprang på 7,84 på 60 meter, medan Henrik Almenningen kom hundredelen bak, på 7,85. Utepersen til Magnus på 60 meter er på 8,02, så dette var solid. Magnus sprang også 150 meter, der han blei klokka inn på 18,80. Henrik på si side fekk tida 25,26 på 200 meter. Henrik knuste inne-persane sine; med eit kvart sekund på 60 meter og med over to (!) på 200 meter.

Eirik Leikvoll sprang på 8,14 på sin 60 meter. Det er solid forbetring av innepersen, sett i Tallinn for nesten eitt år sidan.

Emil Engelsen Holm oppnådde 24,12 på 200 meter.

Sondre Rinde sprang på 7,67 på 60 meter og 24,46 på 200 meter. 24,46 er to tidelar raskare enn innepersen frå Pingvinlekene i år.

På 800 meter for menn fekk me ei rekke gode tider. Dei fleste av utøvarane sprang 1500 meter ikkje lenge etter:

Espen Roll Karlsen sprang best av alle på 800 med 2:01,90.

Jørgen Austvik vann den innlagde interne BFG-duathlonen, med tidene 2:02,57 på 800 og 4:12,91 på 1500.

Stian Øvergaard Aarvik viste på ny sterk inneform: Med 2:04,05 knuste han inne-persen på 800 og 4:12,91 på 1500 meter er berre sekundet bak innepersen, som også er lik U20-klubbrekorden i BFG.

Vår mann i kongens kler, Erlend Gjerdevik Sørtveit, sprang på 2:05,24 og 4:21,70.

Jens Larsen Åstveit  blei kjent i 2013 for å persa i dei aller fleste løpa han stilte opp i. Sånn sett passa det med å avslutta året med 2:06,31 på 800 og 4:23,12 på 1500. Begge deler er nemleg solide inne-persar for Jens.

Vegard Albrigtsen sprang 800 meter på 2:09,01, det er like under sekundet bak utepersen, sett under UM på Lillehammer i haust.

Stian Norheim fekk med seg 2:10,57 på 800 meter og 4:36.46 på 1500. 800-meter tida er god betring av innepersen frå sist romjulsstemne.

Bjarte Eikanger sprang på 2:11,34 på 800 meter og på 4:27,77. 2:11 er vel det beste Bjarte har gjort innomhus på 800 sidan Leikvanghallen var ny.

Egil Johan Hessen sprang 1500 meter på 5:52,03.