Kretskamp i NM

Eg skal ikkje påstå at eg ser andedammen i heimlandet klarare her frå Europas hovudstad, men det kan jo henda at det hjelper.

Friidretten dominerer ikkje media. Friidretten dominerer ikkje sponsormarknaden.

Det er mot denne bakgrunnen lite lurt å gøyma bort friidrettskonkurransar.

Det er veldig lite lurt å gøyma bort konkurrsansar som til og med er norgesmesterskap.

Men det skjer.

Under NM i terrengløp, kort løype (ja, det er faktisk to NM i terrengløp i Norge), så er det ein individuell konkurranse lørdagen og ein stafett søndagen.

I og for seg høyrest ikkje dette så gale ut, men stafettkonkurransen på søndagen er på tremannslag frå kretsar. Laguttaka skjer gjerne svært tett opp til stafettane. Det betyr gjerne at svært mange av utøvarane har reist heim når stafetten skjer. Det betyr også at svært mange utøvarar ikkje kjenner nokon identitet og eigarskap til lag i stafetten.

I årets terrengstafett-NM på Hønefoss var det fem lag på startstrek for menn og to (!) lag for kvinner! For menn var det i tillegg berre fire kretsar som konkurrerte, sidan to av laga var frå Hordaland. For kvinner kunne kven som helst stilt opp og teke NM-bronse.

Ganske utruleg.

Mitt forslag er at forbundet ser til Varegg sitt konsept for tomannsstafett og at stafetten blir ein klubbstafett. Gneist/BFG åleine kunne stilt med fem-seks lag og planlagt ei heil terrenghelg med en slik konkurranse. Det same kunne ei rekkje andre lag gjort.

Men - kven er det som høyrer på meg?