Historietime: Gneistspelen 1992

Me hoppar og sprett litt i den gneistspelske soga, i denne førjulstida - men me er framleis tabloide:

England_Måkestad_Daegu_2011.jpg - Erik van Leeuwen (WikiMedia Commons)

Ingvill Måkestad (Bovim) starta ein stad ho også. Vel, ho starta for så vidt ikkje under Gneistspelen i 1992, men i startgropa er det rett å seia at ho var. Ho stilte i J11-klassen den gongen. Dette var i dei tider det var kurant med 800 meter i J11-klassen. Den vann Ingvill frå Korlevoll på overtydande vis. Tida hennar, 2:36,51, var ni sekund betre enn nr. 2 si. I tillegg vann ho 60-meteren på 9,07 og så blei det ein 6. plass i lengde med 3,80.

Johan Sørstrønen frå Os er me alt kjent med at dominerte resultatlistene på tidleg 1990-tal (og deromkring). Han vann gjerne i spyd. 1992 og 17/18-klassen den gongen var ikkje noko unntak. Lengda var på 54,20. Han vann også 100-meteren (11,63). Spesielt verdt å merka seg, no når Kuventræ er oppgradert for friidrett, er at Os tok 4-dobbelt på 100-meteren i 17/18 i 1992! Det har ikkje skjedd kvart år.

Lite Gneist i dag, men den i visse kretsar nær meg kjende fotball-trenaren i Søreide Idrettslag, Jonny Andersen frå Fri, vann i alle fall 400 meter i 17/18-klassen med brukbare 55,01.