Framfor Askstafetten

April - månaden til Bjørnstjerne Bjørnson - er straks over. Den til Henrik Wergeland, sjølvaste mai, kan ta over.

Og mai blir som vanleg innleia med den første - og med hagearbeid og tog og greier - og med stafett på Ask på Askøy.

Det er 62. gongen dei skipar til Askstafetten der ute. Det skulle innebera at dei kan dette i Ask Friidrett. Vel, dei kan fleire ting - dei har arrangert UM og junior-NM på Ravnanger dei seinaste åra, og i 2016 blir det sjølvaste hovud-NM på stadion der ute.

Men først er det landevegen på Ask.

Veret? Det blir nordavind og kaldt, i alle for tilskodarane, men sola skal skina brukande utpå dagen, så det skal ikkje bli så altfor ille for dei som skal springa. I fjor var det regn av suraste slaget, og for to år sidan - då alle snakka om det tragiske dødsfallet i Flagstaff, Arizona timar før - var det fin sol (men også då nordavind).

BFG Bergen stiller med fire lag. Det står rettnok fem lag på startlista, men det femte laget fekk ein ikkje fylt opp.

I kvinner senior finst det to stafettvariantar - ein på fire etappar og ein på seks. Her stiller BFG lag i begge variantane. På 4 etappar blei det løyperekord for to år sidan (6.18) og årets lag er på papiret på høgde - og vel så det - med dei fire frå den gongen. Det er heile 9 lag på startlista totalt her. På 6 etappar  er det til gjengjeld berre tre lag med - BFG og to frå Gular.

I menn senior B er det også tre lag igjen på lista, etter at det eine BFG-laget er stroke. Dei to andre er Gular (B - dei har to lag i A-klassen i tillegg) og Varegg.

I juniorklassen er BFG eitt av seks lag. Dei to herrelaga er jamne og gode lag.

Korleis det enda i fjor:

* 2. plass til kvinner junior (ikkje lag i år)
* 2. plass til kvinner senior, 4 etappar
* 1. plass til kvinner senior, 6 etappar
* 1. plass til menn junior (for første gongen på 5 år)
* 1. plass til menn senior B