Fristafetten

For dei som var til stades på Espeland onsdagskvelden, så var det ein vemodig aften. Dette var siste gongen Fristafetten blei avvikla i området rundt idrettsplassen der. Ved seinare høve blir det ny løype - enno ikkje detaljbestemt - i området rundt idrettsparken i Indre Arna.

No ja. Det var over 100 deltakande lag totalt, så stafetten har framtida føre seg - også ved ei flytting, vil eg tru.

Mykje god springing av Gneist- og BFG- laga også dette året:

Jenter 11-14- laget hadde vunne stafetten dei 5 siste åra, men blei denne gongen slege av Fana. Fana sette ny løyperekord (som då blir ståande), men Gneist var berre 5 sekund bak, og både AKS og Bergen Turn sine lag på tredje og fjerde var med på å gjera dette til ein historisk god stafett i klassen.

Gutar 11-14- laget vann, derimot, Fristafetten for 6. året på rad. Også her blei det ny løyperekord for evig og alltid, godt og vel ti sekund framfor Fana. Desse to laga var i ein eigen klasse.

I Mix 11-17 blei det 4. sigeren på rad for Gneist - heile 44 sekund framfor nr. 2, Viking.

Aller mest suverene har Gneist vore i Mix 11-14. Her har det blitt siger alle dei siste 7 åra (i alle fall)! Også her får Gneist sitt lag i 2014 bli ståande som løyperekord-haldar for ettertida. Det var 5 sekund ned til Ask på 2. plass og 18 sekund til Gneist sitt 2. lag.

*

For BFG Bergen var det utvilsamt kvinner senior- laget som imponerte mest. Det blei ein 2. plass til slutt, 17 sekund bak Gular. Tidene til både Gular og BFG er svært sterke i historisk samanheng for Fristafetten. I fjor stilte ikkje BFG seniorlag, men årets lag var om lag 50 sekund betre enn beste juniorlaget i fjor - og årets lag hadde 5 juniorar med, så dette var svært lovande.

I menn junior blei det denne gongen 2. plassen, 8 sekund bak Norna-Salhus - etter sigeren i 2013.

Menn senior B- laget gjekk til topps i sin klasse, etter at det blei 4. plass i fjor. Avstanden ned til Gular sitt B-lag var på 18 sekund.

Fristafetten 

	2008	2009	2010	2011	2012	2013	2014
J11-14	2	1	1	1	1	1	2
G11-14	2	1	1	1	1	1	1
Mix11-17	5	-	3	1	1	1	1
Mix11-14	1	1	1	1	1	1	1
KJ	1	1	4	3	2	2	-
KS	1	2	2	-	2	-	2
MJ	1	1	4	3	3	1	2
MS-B	1	2	2	2	1	4	1